14 di Mart 2008: diskurso di S.E. Gobernador na okashon di inougurashon di e edifisio nobo di NAAM
Distinguido presentenan,
Ta parse mi ku entretantu a yega momentu di dal un kèlki di
ròm ku suku i kakou, ke men lo mi no laga bosnan pena muchu
mas! Tòg lo mi ke kompartí kòrtiku asina algun pensamentu ku
boso.
Ora djis un ratu pasá ei nos a kore den outo di Fort Amsterdam
bini pariba pa yega na Johan van Walbeeckplein, mi a disfrutá
di e desaroyo nobo i e revaluashon klaramente visibel di e parti
úniko akí di nos siudat. E kaminda pa yega akí ta hiba nos
bèk na historia di Pietermaai, yamá na honor di e kapitan di
barku Pieter de Mey, kende alrededor di 1740 tabata doño
di e tereno akí. Ora bo drenta e edifisio presioso kaminda nos
ta akí, bo ta saboriá e Kòrsou i e Sint-Eustatius di un 200 aña
pasá, kompleto ku e muzik adekuá pa krea ambiente dje tempu ei.
Tabata un époka turbulento, tambe pa gobernadornan, ku e tempu
ei tabatin un profeshon kaminda nan bida tabata kore peliger
di morto. Outoridat na Hulanda tabata infleksibel pa
ku gobernadornan ku na nan opinion no a komportá
sufisientemente heroiko den resistensia kontra agreshon
strañero. Pasobra miéntras ku na 1929 tabata sufisiente pa
duna Gobernador Fruytier su retiro debí na un supuesto pasividat
di su banda, pa e mes motibu ei, despues di un invashon di
inglesnan na 1808, a kondená Gobernador Changuion asta na
morto. E tempu ei komo gobernador sigur bo no tabata anhelá
pa Hulanda nombrá bo atrobe pa un siguiente periodo!
Manera mi a bisa, tabata tempunan di turbulensia. Na Kòrsou,
pero sigur tambe na Sint-Eustatius. The Golden Rock tabata
kasi permanentemente den estado di guera. Kada bes,
ingles-, franses- òf hulandesnan tabata invadí e isla. Si awe bo
para na Bay Road ku bista riba Lower Town, e siudat rústiko
di Oranjestad, ta difísil pa imaginá ku mashá tempu promé
ku Kòrsou a risibí e státus di porta liber na 1827, ya komersio
na Sint-Eustatius tabata floresé barbaramente. Pa aña, un
promedio di 3000 barku tabata bishitá e isla.
Tur ku tin komersiantenan tabata probechá e posibilidat di
laga transportashon di nan merkansia pasa via e isla liber di
impuesto pa skapa pagamentu di impuesto na nan propio pais.
Bon mirá ta fo’i final di siglo 18, ya kaba a bini ku e
promé konstrukshonnan fiskal antiano.
Ta kuentanan fabuloso di un historia riku. Un historia ku
Tirzo Martha ta konta awe, mediante e eksposishon ku el a
organisá pa nos.
Ta importante pa konservá historia di e islanan di Antia Hulandes.
Pasobra ta “historia ta konta un hende loke e ta”, asina un
filósofo aleman a yega di bisa. P’esei ta di aploudí ku
Stichting ‘National Archaelogical Anthropological
Memory Management’ ta hasi tur esfuerso pa dokumentá i
restourá memoria kolektivo di Antia Hulandes. E fundashon tin
dies aña ta traha e trabou akí di un forma ekselente! Sinseramente
mi ta felisitá direktiva i kolaboradónan di Stichting NAAM ku
nan 10 aña di eksistensia i ku nan edifisio nobo.
Ta mi plaser bati e bèl di bordo di barku i asina inougurá e
espasio nobo kaminda Stichting NAAM ta bai sigui ku su bon
trabou i alabes habri e eksposishon Freeports of the
Caribbean Curaçao and Statia.