3 di Mart 2008: diskurso di Gobernador pa apentura di Kas di Kuido Hamiët

Distinguido presentenan,

Nos mundu di awendia ta kargá ku sufrimentu. Tur dia, ora nos habri korant, sende televishon, hasta kontestá telefòn, nos ta haña nos konfrontá ku mensahe di guera, doló, malesa i morto. Tin hende, kisas nan a pèrdè heful pa tur e sufrimentu akí òf e ta kue nan di gòlpi, ta hisa skouder i bisa “Aloménos no ta ami ta pasa den e kosnan ei.” Otronan, konmové pa e sufrimentu, ta sakudí kabes i bisa, “Esaki si ta algu horibel. Un hende mester hasi algu lihé.” Pero ta solamente un grupo chikí i spesial di hende, esnan karakterisá pa empatia i vishon, ta lanta para i puntra, “Kiko ami por hasi?” 

Danki ku bosnan ta e par di hendenan ei.

E kas di kuido ku nos ta habri awe, lo no por a bira realidat sin bosnan, e hendenan ku a puntra “Kiko ami por hasi tokante e sufrimentu akí?” E kas di kuido akí ta reflehá e empatia i vishon, e  “kompashon aktivo,” di su fundadónan.

Intenshonalmente mi ta uza e término “kompashon aktivo”.  Ta relativamente fásil pa sinti kompashon pa esnan ku ta sufri, pero ta kompletamente otro kos pa tuma akshon i aliviá nan sufrimentu.  I pa aliviá sufrimentu efektivamente, nos mester imaginá nos mes den situashon di un otro.  Esaki nos ta yama empatia.

Dor di demostrá empatia, poniendo boso mes den sapatu di esnan debilitá pa malesa i desesperashon, bosnan, e miembronan di e komunidat di kuido akí, a krea eksitosamente un lugá ku ta bai mas leu ku e nesesidatnan físiko i klíniko di un kliente. Kon ku bai bin, nan no ta solamente pashènt, nan ta hende tambe. Kada kliente den e kas di kuido akí ta yu, mayor, bisiña òf kolega di un hende. Ta ku esaki den mente a krea awor un lugá sigur, kaminda esnan ku malesa terminal por pasa nan último dianan ku dignidat, den pas, kaminda ta sòru pa nan risibí kuido médiko ekselente. Na mes momentu nan ta rondoná pa e konfortabilidat di kas i famia i nan ta haña sosten di nan komunidat religioso.

E famoso eskritor di siglo 19, Mary Ann Evans, mihó konosí komo George Eliot, a yega di skibi lo siguiente “Pakiko nos ta biba, ku no ta pa hasi bida ménos difísil pa otro?” Danki ku bosnan ta e grupito spesial ku a kue e palabranan akí tene duru.

Bosnan a demostrá kapasidat di pueblo di Kòrsou pa sostené esnan ku ta malu i vulnerabel den nos komunidat. Bosnan a demostrá kon empatia i vishon, kombiná ku kooperashon i perseveransia, por produsí algu remarkabel i relevante. Ku e kas di kuido akí, prueba di kompashon aktivo, inspirá otronan riba e isla akí pa puntra  “Kiko ami por hasi?” Ku un ola di empatia pasa riba e isla akí, drenta nos skolnan, misanan, barionan i lugánan di trabou.

Ta un gran privilegio pa mi deklará e kas di kuido nobo akí komo habrí.