3 di yanüari 2008: Diskurso di Ana Nobo di S.E. Gobernador di Antia Hulandes

Distinguido presentenan

Nos a kaba di selebrá yegada di un aña mas. Zonido di vürwèrk a mengua, e platonan delisioso a baha bon i nos a brinda ku shampaña riba salú di otro. Famia i amigunan a bai nan kas bèk, i kisas nos peso a subi un tiki tambe ... pero mas ku tur kos, nos a añadí un aña mas na nos bida. Nos a bira mas grandi ... nos tin mas edat.

Bira grandi no ta nada mas, ku parti di bida! Nos yunan a krese. Nan a bira poko mas independiente awor ku aña pasá. Nos mayornan a bira mas grandi i talbes nan mester di mas sosten ku e aña anterior. Por ta ku nan mester di mas tantu tempu di nos, di mas atenshon i di mas kariño di nos. Mayoria di nos ta konsiente ku ta bon pa duna balor na nos mama i tata. Asina, grado di atenshon i kuido pa miembronan mas grandi, por ta indikashon di kalidat di sivilisashon di un komunidat. Tin hende hasta ta pensa ku un nashon lo prosperá si ta sòru bon pa grandinan. Tantu kuido pa grandinan komo prosperidat di nos nashon ta pegá na mi kurason!

Mi ta orguyoso ku nos tin rèspèt pa nos mayornan. Mi ta áltamente impreshoná ora mi weta ku ta perkurá pa e nesesidatnan emoshonal, spiritual i físiko di nos grandinan. Por yega sinembargo un momentu ku nos lo no por kumpli personalmente ku tur nan nesesidatnan. Nos lo mester di yudansa di otro hende. Ken lo bo ke pa sòru pa bo propio mama?

Òf, imaginá bo, ku bo ta bibando trinta aña mas leu den futuro, Bispu di Aña 2038. Bo a bira bieu ... bo no por sòru mas pa bo mes. Bo yunan no por kuida bo dia kompletu. Bo ta disidí ku bo mester di kuido profeshonal, kisas den un kas di kuido. Ki tipo di persona, bo ta kere, ku lo por kumpli ku e tarea ei?

E profeshonal ku lo por bini na remarke pa e puesto importante akí lo mester ta amabel, kariñoso, efisiente, kompetente i yen di pasenshi. Nos lo ke pa empatia, dignidat i rèspèt guia nan manera di trata nos. Nan sentro di atenshon mester ta nos bienestar emoshonal i nos komodidat físiko. Ta mas ku klaro ku nan mester ta konfiabel i diskreto. Nan mester ta fuerte i den bon kondishon, pasobra por sosodé ku nan mester hisa i karga nos. Pero esei ta tur kos? Nos ta eksigí mas ...

Nan mester ta dispuesto tambe pa yuda nos den nos kehasernan di tur dia. Nan mester tene kuenta ku nos kustumber- i kaprichonan. Esun ke pa pone su kusinchi di sierto manera i un otro no gusta laken. Nos lo ke pa nos personal di kuido respetá nos manera di bisti i nos pertenensianan.

Nos ke pa nan ta ordená i alabes fleksibel, kouteloso pero rápido. Nan mester ta òrdènt i desente tantu den higiena personal komo den manera di papia. Nan mester trata na un manera apropiá ku kos di kome. Nan tin ku traha hopi bes anochi i den wikènt. Anto nos ke pa nan envolví nos famia manera mester. I nos no ke pa nan trata nos manera mucha chikí. Nan mester respetá nos outonomia i nos independensia. Esta un lista no! Nos ta demasiado eksigente? Ken lo por kumpli ku tur esaki?

Ta opvio, ku e esnan ku por lidia ku hende di tal forma, ta hendenan realmente spesial. Ta parse kasi imposibel pa haña hende ku ta reuní tur e kualidatnan akí. Pero nan ta eksistí ... Nan ta pará meimei di nos! Awe nochi mi a invitá e profeshonalnan di kuido akí pa rindi honor na nan i pa gradesí nan pa e hecho ku nan ta mehorá kalidat di bida den Antia Hulandes. Laga nos hasi uso awe nochi di e oportunidat pa topa ku nan i kombersá ku nan.

Mi lo ke proponé pa tost riba tur e hendenan  ku ta kuida esnan di edat avansá den nos komunidat.  Felis aña nobo!