30 di yüni 2007: diskurso di Gobernador pa Konferensha di Hende Hòmber (New Song Gospel Foundation)

 

Distinguido próhimo!

 

 

Mi ta mira yen di diferente hende aki den.Tin hende di edat, hende hóben, hende salú i otronan ku no ta dje salú ei, tin hende kontentu, hende tristu, tin ta flaku, otronan ta gordo, pero loke nos tin komun ku otro ta ku nos ta HÒMBER.  Kiko ta hasi bo hòmber? Kiko ta separá un hòmber for di un mucha hòmber, kiko ta hasié otro for di hende muhé?

 

Loke nos tin komun ku otro ta testosteron.  Nos tin mas o ménos binti biaha mas tantu di e hormona akí ku hende muhé.  E ta hasi bo fuerte i poderoso, ta atribuí agreshon na dje i e ta hinka den bo, pashon i deseo pa hende muhé.

 

Esaki ta algu bon?

 

Aparentemente testosteron ta hinka hende hòmber den problema mas ku tur otro kos. 

E ta dun’é forsa pa bringa i ta bisá ku e ta responsabel pa deseo deskontrolá.  Dikon nos prizòn tin 20 biaha mas tantu hende hòmber ku hende muhé?  Dikon ta hende hòmber ta kometé mayoria krímen violento?  Pens’é, kiko ta hinka bo den problema? Sèks i poder… òf nò? 

 

Pero esaki ta algu malu? Bo por bisa awor, sòri, no ta ami, ta e testosteron, pasó e ta algu malu?  Ta mi hormonanan a lagami hasié?

 

Na kuminsamentu Dios a krea humanidat den Su imágen, hòmber i muhé. Dios a traha hende hòmber i Dios a traha testosteron.  Pa bo ta hòmber i tin testosteron ta algu bon.  Ta Dios Su plan.  Ke men no kulpa bo hormonanan pa bo akshonnan . . .

 

Loke ta hinka hende hòmber den problema ta hombresa i impulsividat deskontrolá. E ora ei e ta mas manera un gorila, kabai òf kachó, kontrolá pa testosteron. Nos tin testosteron meskos ku un animal, pero kon nos ta diferente?  Nos ta trahá den imágen di Dios.  Nos ta sernan spiritual.  Nos por konektá ku Dios i haña dominio propio pa medio di Su spiritu! Pasobra nos ta trahá den imágen di Dios, nos por ta mas ku animal, nos por tin mas ku pashon i agreshon deskontrolá.  Nos por ta fuerte i suave, poderoso i humilde, firme i kariñoso! Forsa i poder, sin suavedat, ta produsí un burdugu. Suavedat i kompashon sin firmesa i agresividat maskulino ta produsí un hòmber sin pashon pa guia i inspirá otronan.  Nos mester ta tantu fuerte, komo bon.

 

Testosteron, hombresa ta bon, tanten ku e ta guiá pa e balornan korekto!  Nos por uza e aktitut di bringa pa atendé ku podernan malu, pa resistí opreshon i para kontra inhustisia.  Dios no a diseñá agreshon pa bringa hende, sea ta bo kasá òf bo próhimo. Nò, e ta pa bo ta fuerte i pa bo hasi bon ku pashon… pa bringa pa hustisia i libertat i pa protehá bo famia, bo komunidat i nos nashon. 

 

Testosteron ta bon i mester di dje pa lanta un famia, pero den e fronteranan di matrimonio. Pasa dushi ku bo kasá, pero solamente kuné!  Ta bon pa bo ta un hòmber pashoná, pero solamente si bo tin dominio propio.

 

Testosteron ta bon i poderoso, ora e ta guiá pa sabiduria.  Lo bo duna un persona deskontrolá un zag di kadena òf un pistol?  Naturalmente ku nò!  Asina mester ta ku bo tambe. Laga sabiduria guia bo.  No sea un animal kontrolá pa testosteron, sea un hòmber spiritual.  Lo bo haña poder pa kontrolá bo inklinashonnan pa medio di Spiritu di Dios.  Dios a traha bo komo un hòmber di forsa, poder i pashon.  Su spiritu por hasi bo mihó ainda: un hòmber di bondat i fieldat.

                            

Proveé pa bo kasá,

protehá bo kasá,

mustra interes p’e,

sea fuerte i kariñoso,

sea  pashoná pero pasífiko. 

Kumpli ku bo promesanan. 

Stim’é. 

Pèrmiti’é di ta un partner igual. 

Komplementá otro. 

Sea un tim!

 

No solamente bo mester ta un bon hòmber, pero tambe, ora testosteron hasi su trabou, un bon tata.  No solamente bo mester ta un hòmber trahá den imágen di Dios, pero tambe un tata trahá den imágen di Dios.

 

Sea e tipo di tata ku ta presente i disponibel. 

Skohe konsientemente pa pasa tempu ku bo yunan. 

Asin’ei bo por ta un guia i konsehero. 

Sea konsiente kiko ta tuma lugá den bida di bo yunan, pa asina bo por protehá nan.  Hasi bo trabou na un manera korekto, pa asina bo por proveé pa bo famia. 

Sòru pa bo yunan ta salú i liber. 

Instruí i kurashá bo yunan, siña nan pa ta disipliná. 

Yuda nan ku nan tareanan; kana ku nan, hasi deporte ku nan. 

Sea un bon wardadó pa nan; guia nan “na awa trankil i den kaminda drechi”.  Maske nan pasa den tempu difísil, “e klof di mas skur”, nan lo no tin miedu di maldat, pasó bo ta ku nan.

 

E ora ei abo lo ta un bon ehèmpel pa bo yunan. 

Pasó mucha lo no hasi loke bo bisa, nan lo hasi loke abo ta hasi. 

 

E ora ei, bo yu hòmbernan tambe lo ta hòmbernan bon. Kon bo kasá ku bo yunan lo reflekshoná na bo entiero? Nan lo bisa, "E tabata un vitó kruel i duru"?  Òf simplemente e no tabat’ei…? Òf nan lo bisa, "El a dediká su mes shen porshento na nos”?

 

E ora ei, lo bo ta un ehèmpel pa bo amigunan tambe.  E ora ei, lo bo ta realmente “salu di mundu”, e mesun supstansia ku ta prevení algu di korumpí i putri. E ingrediente den nos komunidat ku ta mantené nos fresku i dushi.

 

Un bèrdadero machu ta poderoso di kurpa, pero tambe di spiritu.  Un bèrdadero machu ta un hòmber trahá pa Dios, den Su imágen.

 

Sea fuerte i bon!