26 di mart 2006: Diskurso di Gobernador na Okashon di Huramentashon di e Gabinete De Jongh-Elhage

26 di mart 2006: Diskurso di Gobernador na Okashon di Huramentashon di e Gabinete De Jongh-Elhage

DISKURSO DI GOBERNADOR DI ANTIA HULANDES, MR. FRITS M.D.L.S. GOEDGEDRAG, NA OKASHON DI HURAMENTASHON DI E MINISTER- I SEKRETARIONAN DI ESTADO NOBO DI ANTIA HULANDES, DJADUMINGU 26 di MART 2006.

Awe, riba e djadumingu partikular akí nos ta reuní pa huntu ku pueblonan di tur isla di Antia Hulandes nos ta tistigu di huramentashon di e minister- i sekretarionan di estado nobo di nos pais. Manera ta di ferwagt esaki lo ta tambe e último gabinete di e pais ‘Antia Hulandes’. Esei so kaba ta hasi ku awe nos ta dilanti di un suseso históriko. Nos pais ta na bispu di kambionan estatal radikal.

E kambionan estatal akí i e kondishonnan bou di kua nan por tuma lugá no ta toka e islanan di Antia Hulandes sin mas. No ta un kuestion di warda e fecha di 1e di yüli 2007 yega, pa por aseptá e status nobo anhelá. E asuntu akí no ta bai asina asina. Lo mester di hopi esfuerso i lo mester tuma medidanan radikal pa por traha e fundeshi riba kua por edifiká e status nobo di e islanan. Siudadanonan ta spera di nan gobièrnu ku gobernantenan ta hasi nan máksimo esfuerso pa duna nan perspektiva i oportunidat atrobe. Ta trata entre otro di ki forma ta atendé ku e problemanan den enseñansa, kon ta kombatí e desempleo enorme den hubentut, kon ta sanea finansa di gobièrnu, eradiká pobresa i kombatí kriminalidat. E problemanan akí ta keda dominá bida di siudadanonan kual sea e struktura estatal. Riba tur kos: e reformanan estatal mester ta na servisio pa atendé e problemanan na tur isla, mihó ainda.

Ounke e partidonan polítiko ku ta forma e koalishon akí tin nan base na e teritorionan insular di unda nan ta bini, ser minister òf sekretario di estado ta trese kuné ku bo ta sirbi henter e poblashon di Antia Hulandes.Ta nifiká ku ta interes di poblashon di tur e teritorionan insular e gobièrnu akí mester vigilá. Pasobra ounke nos ta mira un struktura estatal diferente nos dilanti, e sintimentunan di solidaridat, di union i amistat entre pueblonan di nos teritorionan insular ta keda prominentemente presente.

Meskos tambe ta e kaso ku relashonnan dentro di Reino. Reino no ta solamente un entidat hurídiko, sino tambe un komunidat di hende ku balornan komun. E komunidat akí ta garantisá e prinsipionan di un estado di derecho demokrátiko i di e ‘rule of law’ ku e kondishonnan por krea pa stabilidat i prosperidat.

Mi ke gradisí señor Ys i su minister- i sekretarionan di estado pa loke nan a hasi último añanan na interes general di poblashon di Antia Hulandes. Semper mi a apresiá mashá e kooperashon ku miembronan di e gabinete ku a kaba di baha. Mi ta deseá boso i boso famianan tur kos di mihó pa futuro. Pa loke ta e mandatarionan ku ta bolbe den e gabinete nobo, mi ta anhelá e laso di un kooperashon renobá ku nan.
Pa loke ta formashon di e gabinete nobo, un palabra di gratitut na señor Atacho ku a tuma enkargo komo formadó di e gabinete. Ku gran determinashon el a traha promé komo informadó i despues komo formadó pa den un tempu rèkòrt el a forma e gabinete. Señor Atacho, mi ta gradisíbo i bo ekipo mashá pa bo esfuersonan i e resultado ku ta pará bibu akí nos dilanti.

Mi ke felisitá señora De Jongh-Elhage i su tim ku a kaba di presta huramentu, tambe na nòmber di mi esposa. Bo a aseptá un gran responsabilidat den un periodo sumamente difísil. Mi ta deseábo hopi forsa i sabiduria i mi ta ferwagt ku nos lo tin un bon kooperashon di trabou.

Mi ta ekstendé felisitashon tambe na e famia- i parientenan. Ban traha den bon armonia, di komun akuerdo, di forma transparente i segun prinsipionan di bon gobernashon ku partnernan sosial, na interes general di e teritorionan insular i nan pueblonan.