25 di december 2006: Mensahe di Pasku 2006 pa televishon di s.e.. mr. F.M. d.l.S Goedgedrag

Mi ta dirigí mi na boso pa deseá boso, tambe na nòmber di mi kasá i yunan, un Felis Pasku!

Pasku ta un temporada di duna. Ora mi skucha hende papia durante e temporada di Hanuká i Pasku akí, hopi biaha mi ta tende e palabranan: Kiko bo a haña? Kiko bo a haña? Otro biaha mi ta tende: Kiko bo a duna? Kisas algun persona ta mas inkliná na enfoká riba risibí i otronan ta pone énfasis riba duna.

Ora mi sa biaha pa nos diferente islanan, mi ta bai aeropuerto i djis promé mi bira na man drechi, mi ta mira e bunita bòrchi nobo ku nòmber di Plasa Margareth Abraham. Margareth Abraham tabata un stewardess di ALM. Dia 2 di mei 1970, ora ku buelo 980 tabata aserkando Sint Maarten, e avion a hañ’é den problema i mester a desviá bai St. Croix. Lamentablemente e avion mester a  hasi un aterisahe di emergensia riba laman. Di e 63 personanan ku tabata na bordo, 40 a skapa i 23 a muri. Un di esunnan ku a muri tabata Margareth Abraham, ku a sakrifiká su bida, pa a salba mas persona.

Margareth Abraham tabata un héroe antiano. Un héroe ta un persona ku kurashi! Un héroe ta un persona di bon karakter moral. Pero prinsipalmente un héroe ta un persona ku ta pèrkurá na promé lugá pa otronan i despues pa e mes. Un héroe ta un persona ku ta sakrifiká pa un otro persona.

Lo mi ke bisa boso mi deseo di Pasku: Mi ke pa nos tin mas héroe na Antia Hulandes. E balor di mas grandi pa un héroe ta e balor di amor. Ku amor bo ta enfoká promé riba otronan enbes di bo mes. E karakterístika di amor ta duna i no tuma. Amor ta: sakrifiká  algu ku ta di bo na fabor di un otro persona. Héroenan ta personanan ku ta duna i ta duna hopi... nan ta duna di nan energia, nan tempu, plaka, atenshon òf kisas asta nan propio bida. Un héroe ta un persona ku ta stima!

Moralidat tin su rais den amor. Tur norma i balor ta resumí den amor. Hende ku ta stima no ta insultá,.....nan no ta hòrta,.....nan no ta gaña,......nan no ta mata. Mucha ku a lanta ku amor ta honra  nan mayornan. Hende ku ta stima, no ta hasi redu ni papia malu di otro. Hende ku ta stima nan pais, no ta tira nan shushi den mondi. Hende di amor no ta kore outo ora nan bebe. Hende ku ta stima no tin mester di lei.

Tin hende ta kere ku kontrario di amor ta odio; pero ku odio ainda bo ta enfoká riba un otro persona. Ainda bo ta sinti un tiki pa e persona ei. Segun mi, kontrario di amor ta egoismo; ora hende ta pensa prinsipalmente riba nan propio interes,....nan propio gloria, poder, fortuna, komodidat, nan ego. Hende egoista mashá poko be por bira héroe.

Miéntras ku moralidat ta un karakterístika di amor, esensia di inmoralidat ta egoismo. Ta inmoral ora un mama no ta kuida su yu. Ta egoista ora un tata no ta mantené su yunan. Akaso no ta inmoral ora mayornan ta uza nan tempu i energia, bringando ku otro, enbes di kria nan yunan?

Antó inmoralidat ta karu! Hasiendo loke ta bon,...stimando,....ta bon pa nos ekonomia. Bo por imaginá bo... un nashon sin korupshon, sin embaraso hubenil, sin matamentu òf aksidente pa motibu di hende burachi? Bo por imaginá  bo un isla kaminda mama- i tatanan ta lanta nan yunan na un manera ku nan por bira siudadanonan desente, kaminda kada ken ta kontribuí i niun hende no ta kita for di otro. Bo por imaginá bo nos prizòn i salanan di emergensia kasi bashí? Nos lo spar un balente kantidat di plaka!

Por ta ku algun hóben ta kriminal, pasobra nan no tabatin un héroe ora nan tabata kresiendo? Un hende ku tabata stima nan, pèrkurá pa nan, i sakrifiká su mes? Un hende ku tabata determiná pa duna su yu un desaroyo kompletu? Ta bon pa desaroyá mucha... pero no solamente intelektualmente, sino prinsipalmente spiritualmente i moralmente. Ki nos komunidat ta gana ku un ladron bon eduká, pero ku simplemente ta siña kon hòrta mihó? Sí,....nos tin mester di hende studiá, pero mas ku esei, nos tin mester di hende ku ta stima. Hende ku ta dispuesto na riska nan bida, bula den awa pa salba un mucha ku a kai den laman. Hende manera Margareth Abraham.

Ken ta bo héroe?

Nelson Mandela? E hòmber ku a lucha pa libertat i hustisia i désinteresadamente a sirbi su hendenan?

Martin Luther King? E hòmber ku a riska su bida pa realisá un soño kaminda tur hende ta igual?

Mama Teresa? E muhé ku a preokupá asina tantu pa desaroyo di mucha, apesar di e rekursonan limitá ku e tabatin na su disposishon?

Hopi hende tin Hesus di Názarèt pa nan héroe. Esun ku nos ta selebrá su nasementu awe. El a pasa su bida ta kuida, liberá, kura i desaroyá hende. E tabata motivá pa amor. Su siguidónan ta kere ku el a stima asina tantu ku el a entregá su propio bida, di manera ku hende por rekonektá ku nan kreador, sin miedu, kulpa òf bèrgwensa.

Otronan tin Ghandi, òf Moises òf Moses òf Mohammed komo héroe. Tur esakinan ta hendenan ku a duna!

Kisas bo héroe ta Maria Corstjens, konosí tambe komo Tanchi Mia, ku a bin ta sirbi e komunidat di Kòrsou pa e último 53 añanan. Diariamente e ta risibí gran kantidat di artíkulo komo donashon na su kas, i kada pasa dia e ta yama iglesianan, trahadó- i otro gruponan sosial pa bin kue e artíkulonan akí. Dikon? Pa amor!

Mi a puntra, ken ta bo héroe, pero un pregunta mas difísil ta: ken su héroe ábo ta?

Tatanan, boso ta héroe di boso yunan?

Ora a puntra Miss Curaçao 2002 ken ta su héroe, el a bisa su héroe ta su tata. Kon lo bo sinti bo si bo yunan bisa ku bo ta nan héroe?

Mamanan, boso ta héroe di boso yunan?

Dosentenan, boso ta  héroe di boso studiantenan?

Lidernan spiritual, boso ta héroe di boso siguidónan?

Negoshantenan, boso ta héroe di boso trahadónan?

Polítikonan, boso ta un héroe pa esunnan ku a skohe pa konfia boso?

Bo ta un héroe den bo bario?

Mi ta spera ku bo por kumpli ku mi deseo di Pasku i bira un héroe pa un persona...

Bon Pasku.