Dirskurso di Gobernador pa Emisora Antia Hulandes - fin di 2009

Aña ta kabando. Ta den e temporada di aña akí, mas ku nunka, nos ta bishitá famia i amigunan pa pasa e dianan spesial akí den nan kompania. Ku nan nos ta wak bèk riba e aña kasi tras di lomba, pa mira si el a trese pa nos loke nos a pensa, i nos ta bira konsiente di nos ekspektativanan pa e aña binidero. Kiko nos ta spera i kiko nos ta proponé pa nos mes?

Hopi deseo, pensamentu i ekspektativa ta di un karakter personal i nos ta kompartié únikamente ku algun hende, òf ta tene esakinan kompletamente pa nos mes. Pero banda di esei tin tambe susesonan ku ta konserní nos tur i riba kua kada un di nos tin su propio pensamentunan.

Un bon ehèmpel di esaki ta e kambionan estatal ku Antia Hulandes ta hañ’é konfrontá kuné.  Den último lunanan di e añ’akí a palabrá ku Antia Hulandes lo stòp di eksistí komo entidat estatal dia 10 di òktober 2010. Kòrsou i Sint Maarten lo sigui komo Pais denter di Reino Hulandes, miéntras e otro islanan lo desaroyá un laso estrecho ku Hulanda.

Mirando bèk riba Pais Antia Hulandes, mester konstatá ku esaki no a funshoná manera a spera na prinsipio di añanan sinkuenta di e siglo anterior.

Naturalmente no ta un entidat mester funshoná; esaki ta prinsipalmente tarea di hende i no struktura. Pa loke ta trata esei, por bisa den sentido general ku na Antia Hulandes tabatin muchu tiki interkambio i kooperashon entre e islanan pa por krea e sintimentu ku tur hende ta pertenesé na ún pais. E islanan a keda tòg prinsipalmente,  isla, sin ku a desaroyá un sentido di pais.

Den  futuro serkano e islanan di Antia lo drenta kamindanan nobo separá. Kada un di nan mester bai operá den un dimenshon estatal nobo. E ruta konstitushonal ku e islanan lo bai sigui, ta brinda kada un di nan posibilidatnan nobo den nan desaroyo. Na mes momentu ta krea ekspektativanan pa nan habitantenan.

Ta keda na e mandatarionan di e islanan nobo Kòrsou i Sint Maarten, i na e mandatarionan responsabel di Boneiru, Sint Eustatius i Saba, pa kambia e ekspektativanan ei den progreso tangibel pa e poblashon di nan islanan.

Apesar di e kamindanan separativo, tur sinku isla ta keda forma parti di Reino Hulandes. Tantu pa e islanan ku ta bira parti di Hulanda, komo pa e islanan ku ta bai sigui komo pais outónomo, ta konta ku Lareina ta keda nos hefe di estado i ku nos ta keda kompartí e mes nashonalidat. E Struktura di Reino ku ta kambia akí  ta pidi sí un vishon renobá riba e kompromiso mutuo i kooperason entre e partinan di Reino.

Ta p’esei ta alegrá nos di mira ku e sekretario di estado di Asuntunan Interior i relashonnan di Reino a kuminsá ku organisashon di e seri di simposio ‘Futuro di Reino’. Durante e simposia akí, di kua lo bai tene unu tambe na Kòrsou, ta wak kiko ta e kosnan ku ta uni nos den Reino i kiko ta e balornan ku nos ta kompartí ku otro. No solamente aworakí, sino tambe den futuro.

Pasobra ta esei ta konta tòg, prinsipalmente den e temporada di aña akí.

Por dediká mashá hopi tempu na mira bèk riba e periodo ku ta tras di lomba, pero ta trata tòg prinsipalmente di realisá e ekspektativanan positivo pa futuro. Esei ta konta pa boso tur den boso propio bida i pa gobernantenan enkuanto e poblashon.

Mi ta deseá boso dianan di Pasku bendishoná i un próspero i saludabel 2010.