1 mei 2009: Diskurso di Gobernador Dia di Obrero 2009

Ya pa basta tempu nos ta selebrá aña di Lareina i su manisé nos ta para ketu na importansia di dia di obrero. Ta mashá di lamentá ku ayera e selebrashon na Hulanda a kuminsá asina festivo pa terminá dramátikamente ku un kantidat di morto i herido. Mi ke laga sa ku nos ta kompartí pena di esnan ku e víktimanan a laga atras i di komunidat hulandes.

Awe,  Dia di Obrero, nos no ta selebrando trabou, ni tampoko un dia liber di trabou. Promé di mei ta e dia kaminda nos ta kòrda e introdukshon di parti un dia di trabou den tres parti di ocho ora. E promé biaha ku a selebrá esaki na Europa tabata 1890.

Loke sí nos ta selebrando awe ta balanse den nos bida, partishon hustu di trabou, tempu liber i sosiegu. E partishon di ocho ora di trabou akí siguí pa ocho ora di tempu liber i ocho ora di sosiegu ta un desaroyo relativamente resien. Legislashon den e último siglo ku ta konserní kondishonnan di trabou i salarionan, meskos ku introdukshon di teknologianan di sparmentu di tempu i un kambio den normanan kultural a pèrmití nos pa biba un bida mas balansá. Nos no tin mester di kastigá nos kurpa mas 16 ora di dia, subi kama morchá i despues spièrta i kuminsá kompletamente di nobo. E balanse akí entre e tres aspektonan signifikante di bida ta duna nos e oportunidat di biba un bida mas felis i salú.

Awe nos ta selebrá ku nos trabou ta duna nos e oportunidat di kontribuí. Trabou no ta kastigu. Trabou ta un manera di kontribuí na nos komunidat. Mediante nos trabou, nos ta kontribuí ku nos famia debí ku nos ta gana nos chèk di pago ku ta sòru pa kuminda i lugá di drumi pa nos sernan kerí. Nos ta kontribuí na nos kompania rekonosiendo ku nos trabou ekselente ta kontribuí na éksito di nos kompania i éksito di e kompania na su turno ta tradusí su mes den éksito pa nos mes. Nos ta kontribuí na nos pais ofresiendo servisio òf produkto. Nos por sinti nos mes importante sabiendo ku nos mannan a konstruí e kaminda ku nos ta kore ariba, ku nos sonrisa a mehorá servisio pa kliente i ku nos ideanan a hasi un diferensia. Nos tur ta djente den e mes rueda i e echo ku nos ta traha ta pone e mashin drai suavemente. Trabou por hasi nos orguyoso i satisfecho. Trabou no ta pa katibu, trabou ta spesialmente pa sernan kreativo. Asta Dios a traha, krea, produsí.

Banda di kontribuí mediante trabou, nos ta selebrá awe ku momentunan di tempu liber ta duna nos e oportunidat di desaroyá nos mes. Tin biaha bo ta haña mashá gana pa bini kas despues di trabou, benta kurpa den sofá i pa restu di dia djis wak televishon. Tin biaha esaki ta nesesario kisas, pero no ta muchu mas mihó pa logra mas tantu posibel den nos tempu liber i rekonosé kon e benefisionan di invershon den nos propio desaroyo por plama den tur aspekto di nos bida? Lo no ta bon pa desaroyá nos mente mediante kurso-, buki- i weganan?

Lo no ta benefisioso pa desaroyá nos relashonnan, mediante senanan ku amigu, kòfi ku un mèntòr òf preparando pa Karnaval huntu ku otronan? Investigashon ta mustra ku e úniko faktor ku studiantenan ku beka tin komun, no ta sèn òf inteligensia, sino ta ku nan tur ta kome huntu komo un famia.

Ta noble pa uza bo tempu liber pa partisipá den organisashonnan di komunidat òf klupnan di deporte. Ta bon pa uza tempu liber pa desaroyá nos espíritu mediante enkuentronan di orashon i meditashon. Ta eksitante pa desaroyá nos talentonan i siña abilidatnan nobo.  Ke men nos ta desaroyá nos sentido propio eksplorando nos pashonnan i deskubriendo kosnan nobo.  Meskos ku un karpinté tin ku tuma tempu pa sleip su zag, pa por traha mas lihé i mas efisiente, asin’ei nos tambe por tuma tempu pa bira ‘skèrpi’ atrobe.

Awe nos no ta selebrá solamente orguyo den nos trabou, i e chèns pa desaroyá i bira mas sabí, sino tambe ku nos tempu di sosiegu ta duna nos e oportunidat pa restourá nos mes. Sosiegu no tin keber solamente ku soño. Sosiegu ta duna bo e oportunidat pa rekuperá. Meskos ku nos ta limpia e ko’i shushi den nos outo, i laba i pòlish su bòdi, yena kombustibel i saka sla i raská, asin’ei nos mester kuida nos mes durante e periodo di sosiegu. Sosiegu ta impliká restourashon di mente, kurpa i espíritu, ta duna nos tempu pa reflekshoná i laga nos deshasí di loke ta polushoná, pa drecha loke tabata dañá. Un kurpa ta restourá mediante soño adekuá, ehersisio i bon kuminda. Nos spiritu ta bira mas kompletu mediante orashon, kantamentu i meditashon.

Kon nos ta pasa nos 8 oranan na trabou tin impakto riba kon nos ta sinti durante nos tempu liber i tempu di sosiegu. Kon nos ta pasa nos tempu liber i di sosiegu lo tin impakto riba nos dia na trabou. Nos mester kòrda nifikashon di kada un di e aspektonan akí. Nos tin ku rekonosé e balanse úniko ku ta bini di e resultado di nos esfuerso pa saka mas tantu posibel for di e tempu ku nos tin disponibel pa asina kontribuí, desaroyá i restourá.

Hañando e balanse aki nos lo por traha manera mi a bisa ántayera, na okashon di Aña di Lareina, na un mihó komunidat. E mihó komunidat ei ta kuminsa ku nos mes. E komunidat ta nos mes.

Huntu nos ta logra muchu mas. Laga nos uni forsa, dunando otro e rèspèt nesesario. Hasiendo esaki nos lo por ta orguyoso di nos mes, di otro i di nos komunidat.

Un felis dia di obrero ta deseo di mi na boso tur.