29 di Aprel 2009: Entrega di Kondekorashon Real

Presidente di nos Parlamento, señora Minister Presidente, demas ekselensianan distinguido invitadonan, tambe na nòmber di Dulcie un kordial bonbiní na un i tur i mui en partikular na nos kondekoradonan.

Promé ku mi anunsiá ta ken i pa kua motibu nos ta kondekorá awe, mi ta kere ku ta na su lugá pa brevemente mi duna splikashon tokante un punto. Ta un hecho ku tin un aspekto importante den nos mundu moderno ku ta motibu pa kondekorashon, pero ku na mes momento sa trese basta konfushon.

Mi ta referí aki na e kuido kontinuo di personanan ku ta den nesesidat. Ta trata di kuido kontinuo di personanan ku no por atendé nan mes. Por pensa na personanan ku un enfermedat króniko o un disfunshon mental o físiko.

E kuido akí por lo general ta personanan ku sosialmente ta serka di esnan ku mester di kuido, esta e próhimo, ta duna nan. E kuido akí ta masha konosí mes den nos komunidat, pero pa straño ku por ta, mi no por a kai riba un nòmber adekuá na Papiamentu. Na Hulandes nan ta papia di “mantelzorg”. Un palabra ku no ta aparesé den ningun di nos dikshonarionan; ta trata aki di e kuido boluntario di famia i konosí.

Mantelzorg ta un manifestashon pa ekselensia di amor pa bo próhimo i ku ta algu ku ta bai kompañá ku masha hopi sakrifisio personal mes. Ta te ora e persona no por yuda su mes mas i ku no tin perspektiva riba mantelzorg, e persona ei por haña kuido profeshonal na kas.

Pues mantelzorg ta algu ku den nos komunidat moderno a bira notabel i remarkabel. E ta reforsá e koheshon sosial den un komunidat; e tin di haber ku e empatia ku mi a menshoná den mi diskurso di Pasku di Nasementu aña pasá.

Un punto importante ta ku e mantelzorg ta sosodé sin pago.

Otorgá kondekorashon komo muestra di apresio di komunidat pa e motibu akí ta bira masha bon posibel.

Por sierto a adaptá entretantu e kriterionan en konekshon ku esaki tambe. Pa mantelzorg bira un motibu pa kondekorá, e mester sosodé pa personanan ku lasonan familiar, kuminsando for di segundo grado bai ariba òf amigu- i konosínan. E kuido di mayornan na nan yunan òf di yunan na nan mayornan òf entre partnernan ta  algu asina lógiko ku e kuido akí no ta ser konsiderá komo mantelzorg i pues ku e persona ku ta duna e kuido akí no por bini na remarke pa un kondekorashon.

Fuera di esei e kuido mester abarká un periodo konsiderabel i enserá un kantidat mínimo di ora pa siman.

Mi tin ku remarká sinembargo ku e kondekorashon akí ta un rekonosimentu di e komunidat, pero esun ku ta duna muestra di su amor pa su próhimo òf famia no ta hasi esaki pa haña ningun rekonosimentu òf un kondekorashon.

 

Laga nos ban mira a base di kua kriterio La Reina a haña bon pa kondekorá nos siudadanonan.

Manera nos tur por a tende awor ratu ei di Atzjudant Sherlon Hinkert nos tin e aña akí atrobe un kantidat respetá di kondekorado riba nos diferente islanan:

Kòrsou: 19;

Sint Maarten: 06;

Boneiru: 04;

Sint Eustatius: 02, pues en total 31 persona.

 

 

 

 Na Kòrsou e 19 personanan a risibí nan kondekorashonnan pa e siguiente motibunan:

señor Serapio Augustin Pinedo pa su trabounan riba tereno kultural, trahando entre otro ka’i òrgel i dunando kursonan  pa esaki; señora Florentina Jolan Ng pa su trabou durante masha hopi aña mes den scouting antiano, pa su trabounan pa yuda konservá naturalesa i medio ambiente i pa Federatie Antilliaanse Jeugdzorg; señor Ernst Meyer pa su trabounan yudando hóbennan den e deporte di beisbòl i den kornan di misa; señor Raymond Raphael Martha pa su trabounan riba tereno di deporte ku hóbennan, mui en partikular e deporte di vòlibòl; señor Egidio Bonifacio Kook, kende pa hopi aña tabata aktivo den scouting antiano, ta ainda den e kuerpo boluntario VKC i pa su aporte na deporte i kultura di Kòrsou; señor François van der Hoeven pa su trabounan durante años na Kòrsou, Hulanda i Sint Maarten, su esfuerso pa konservá naturalesa i protehá nos medio ambiente i monumentonan; señora Grace Goede-Martina pa su trabounan durante hopi aña pa scouting antiano i komo boluntario den entre otro Female Jaycees Curaçao i Toastmasters Club; señor Frits Jouke Faber pa su trabounan den enseñansa, mui en partikular pa Vereniging voor Protestants Christelijk Onderwijs aki na Kòrsou, pero tambe pa su trabounan similar na Hulanda; señor Sylvio Franciscus Emerenciana, kende ta trahando pa años den enseñansa, ta aktivo riba tereno di aviashon i músika; ademas pa su trabounan den Stirana pa kombatí desasternan natural den nos pais; señora Ligia Julia Bomba pa su trabounan den  Stirana pa kombatí desasternan natural den nos pais i demas trabounan sosial na Kòrsou; señor George Lucas Alberto pa su hopi trabounan riba tereno di deporte na Kòrsou, kaminda por menshoná su envolvimentu ku futbòl i sòftbòl, kombiná ku su trabounan sosial; señora Violet Lutarca Mathilde Ravenstein-Lourens pa su trabounan riba tereno di enseñansa, pero mui en partikular pa su yudansa na nos hóbennan i nos grandinan den bario, su trabounan den kooperativismo; señor Ruben Emanuel Page, kende pa hopi aña tabata den organisashonnan manera Jaycees nashonal i internashonal, tabata aktivo den enseñansa i Iglesia Metodista den diferente funshon; señor Jules Jozef Dionisio Ilario pa su múltiple trabounan den enseñansa, Jaycees i Kiwanis, banda di su trabounan sosial pa esnan den nesesidat den nos komunidat den Pro Alfa i via Fundashon Era Nobo; señor Anselmus Theodoor Dap, konosí pa su balor enorme i trabounan inkansabel riba tereno di kultura, mui en partikular muzik di Kòrsou; ademas pa su trabounan boluntario den enseñansa; señora Philippine Maria Cijntje-Groeneweg tabata aktivo pa vários aña den enseñansa i den Female Jaycees Curaçao i ta wòrdu kondekorá partikularmente pa su trabounan boluntario den Dierenbescherming Curaçao; señora Gertrudis Theresita Calister-Petronia pa su trabounan durante hopi aña den enseñansa , kaminda e tabata instrumental den lantamentu di Krèsh Kuido Infantil; tambe mester menshoná su labornan den Pro Alfa i Fundashon Yuda Maris Stella; señor Elfried Lucio Aniceto pa su trabounan den enseñansa, den Sede Antias  i e tantísimo trabounan boluntario pa nos hóbennan na Kòrsou; señor Emsley Dionysio Tromp pa banda di su okupashon profeshonal importante, su esfuerso inkansabel riba tereno sosial, ekonómiko, finansiero i gubernamental na bienestar di nos komunidat

Na nòmber di Su Mahestat Reina Beatrix, Gobièrnu di Reino, Gobièrnu di Antia  Hulandes i ku pèrmit di gezaghèber, na nòmber  di Gobièrnu di  Kòrsou, finalmente tambe na nòmber di Dulcie mi ta felisitá boso ku boso kondekorashon.

Mi ke ekspresá mi apresio pa boso esfuersonan, pa e trabou di boluntario na bienestar di nos komunidat i pa sirbi komo héroe i símbolo.

Masha danki na nòmber di henter pueblo i di tur esnan ku por a benefisiá di boso servisio i trabounan, pa tur lokual boso a hasi i ta sigui hasi pa nos pais i nos pueblo.

Finalmente masha pabien na famia, amigu-, kolega- i konosínan di e kondekoradonan.