2 di yanüari 2009: Diskurso di Ana Nobo 2009 di Gobernador di Antia Hulandes

Distinguido invitadonan,

Mi ke yama boso tur bon biní. Mi ke kuminsá ku konta e historia di e “Grid-Iron-Gang”. Ta un historia verídiko ku a sosodé poko tempu pasá na Estádos Unídos.

E trahadónan den un sentro di detenshon hubenil na Los Angeles tabata sinti nan mes frustrá pa nan nivel abou di éksito den rehabilitashon di e tinernan den nan kustodia. Un kolaboradó a disidí di purba algu diferente. El a forma un tim di futbòl. El a yama e muchanan huntu i bisa nan: “Awe bosonan tur ta pèrdèdó, ma na final di e temporada akí, boso lo ta ganadó”. E tabatin rason. E muchanan ei tabata pèrdèdó. Nan a sali for di famianan marká pa maltrato, adikshon; nan tabatin problema na skol i un bida yená ku frakaso i desesperashon a pone ku nan a haña nan enbolbí den kriminalidat. E kolaboradó na e sentro di detenshon a fòrsa e muchanan akí pa traha mas duru ku nunka ántes nan no a hasi. E tim a sufri derota humiliante un tras di otro i hopi di e integrantenan tabatin gana di entregá. Pero despues di algun training i wega, e muchanan akí a kuminsá duna nan mes kuenta ku nan a bira ganadó, no pa motibu di e kantidat di punto ku nan a skor, sino pa motibu di e kambionan ku nan a eksperensiá den nan sentido di balor propio i e heful di sinti nan mes na kas. E muchanan akí a bira ganadó pasobra nan a siña pa legumai nan peleanan di kaya i egoismo i traha huntu komo un tim. Nan a siña aseptá derota ku humildat, pero tambe perseverá ku kurashi. I tur e lèsnan akí a hasi e muchanan ganadó no solamente di e partido di futbòl sino tambe den e wega di bida.

E historia akí ta ilustrá e poder di deporte pa kambia un persona i produsí ganadó. Ta pa e motibu ei mi a invitá miembronan di nos komunidat deportivo. Mayoria di hende ku ta metí den deporte no a kuminsá komo pèrdèdó, manera e hóbennan di e “Grid-Iron-Gang”. Mayoria di nos ta drenta aden pasobra nos ta gusta pasa prèt ku otro òf siña un abilidat nobo. Pero kual sea e motibu òf ken ku bo ta, praktiká deporte ta forma karakter.

Atletanan ta hende disipliná. Nan ta praktiká, perseverá i nan ta buska pa sobresalí. E ora ei ta desaroyá e aktitut di perseveransia i disiplina i e aktitut akí ta esensial den deporte , pero tambe na skol, trabou i den bida familiar.

Hasi deporte den tim ta siña abilidat sosial, ta praktiká hunga segun regla i ta inkulká rèspèt i deportivismo. Siña kon ta bira un hungadó den tim ta fundamental den deporte, pero tambe den bida en general. Un bon coach ta siña nos pa preokupá nos mes mas pa e éksito di e tim ku pa nos propio honor. Un bon coach ta traha riba formashon di karakter i un sentido di fair play. Un bon coach ke logra viktoria, pero na un manera honesto i sano. Un mal coach al kontrario ke gana a todo kosto, maske e kosto ei ta nifiká pèrdida di integridat. Hunga sin integridat, sea den deporte òf den bida, ta hasi di e persona un pèrdèdó i no un ganadó.

Mi ta orguyoso di e impakto positivo ku boso ta ehersé riba nos nashon. Mi ta agradesido ku pa boso motibu tin hende ku ta fuerte i ku resistensia. Mi ta rindi homenahe na bosonan pasobra boso ta stimulá aktitut di perseverá, di ser hustu i di kooperá den Antia. Danki na boso ehèmpel, hopi hende por dil ku desapunto sin entregá.

Pero esei no ta tur kos. Den e sosiedat moderno di hende ku ta sinta henter dia sin move, boso ta e role modelnan. Bosonan ta den bon kondishon físiko.

Boso ta tuma tempu pa keda den kondishon físiko ekselente. Nos mester di mas hende manera boso pa yuda kambia un mal kustumber, e kustumber di sinta henter dia na trabou i despues sinta henter anochi dilanti di kòmpiuter òf televishon. E kustumber akí ta pone hopi di nos riba kaminda pa obesidat.

Trata ku obesidat den nos sosiedat ta un asuntu  hopi kompliká. Nos mester di hende salú ku energia pa traha den e nashon akí.

Boso no solamente ta mustra nos balor di disiplina, pero boso ta mustra nos tambe kon dushi ta pa ta aktivo ku nos amigunan riba kancha di basketbòl òf den klup di kaminata, i kon bon ta pa fòrsa nos mes pa ta den un bon kondishon físiko. Sigui sirbi komo modelo di bon kondishon físiko i di karakter fuerte, inspirá amigu i famia pa kuminsá move, invitá esnan rònt di boso pa adoptá un estilo di bida mas aktivo, di moda ku nos tur lo sinti nos mes bon, yen di energia, i por sierto sinti nos un ganadó.

Laga nos brinda pa un aña 2009 felis i salú.