1 di Mei 2008: Diskurso di Gobernador na okashon di Dia di Obrero

Un proverbio hulandes ta bisa: “Si Pasku i Pentekòster kai riba e mesun dia ...” Esei ke men: imposibel, e kos ei lo no sosodé nunka. Manera nos ta  bisa aki na Antias: dia gai haña djente òf dia gai pone webu. Pero tòg awe tambe ta un dia eksepshonal. Pasobra no ta Pasku i Pentekòster ta kai riba e mesun fecha, sino Asenshon i promé di mei:  Dia di Obrero. Anto ta resultá ku esei no solamente ta masha bon posibel, pero ku e kombinashon ei ta masha bon tambe. Naturalmente boso lo puntra: bon mirá, kiko e ke men, di kiko e ta papia? Ta hustamente di e tópiko akí mi ke papia ku boso awe.

Mi ke toka e tema di un dia di fiesta kristian, pa selebrá asenshon di Hesukristu di un banda, i di otro banda e dia di emansipashon di e movementu obreril, ku un dia a kuminsá ku e lucha pa un dia di trabou di 8 ora. Ta parse na promé bista algu difísil di kombiná. Ma tòg no t’asina segun mi.

Nos selebrashon huntu awe den Misa di Santa Famia, riba Dia di Obrero, a inspirá serka mi un pensamentu partikular ku mi ke kompartí gustosamente ku boso.

Pasobra kiko ta e tema sentral di Beibel?

No ta un vishon riba un sosiedat hustu?

No t’asina ku Beibel i otro bukinan santu ta kontené un apelashon na nos pa pone den práktika hustisia, solidaridat i kompashon ku hende?

No t’asina ku Beibel ta tene duru na un soño di tera nobo kaminda hustisia ta reina? I no t’asina ku e espíritu di Kristianismo ta topa aki ku e pensamentu di Dia di Obrero? Huub Oosterhuis, un filósofo famá hulandes  a mustra nos riba esaki di un manera luminoso den su charla di aña pasá.

Lantamentu for di soño di e “desechadonan di mundu” ta un imágen di un salmo di Beibel ku a drenta den Sosialista Internashonal. Asina mes; den “Internationale”, e himno di e movementu obreril internashonal.

Esaki dirigí riba un sosiedat hustu i un polítika hustu, di kua a propósito mi ke remarká  ku esaki no ta un privilegio di partidonan polítiko sosialista só, manera hende tin biaha sa pensa.

Nò, esaki ta konta pa tur ku ta laga e palabranan “sea hustu” sigui traha den nan konsenshi i den nan aktonan.

Tambe na tur ku ta tuma komo guia e lema bíbliko “Salba esnan ku no sa kon defendé nan mes” i na tur ku ta rechasá e implakabel lei di esun mas fuerte.

Konstruí un sosiedat hustu no ta kos ku bo ta hasi bo so. Esei ta rekerí sosten sosial i kooperashon. Tambe – i kisas na promé lugá – di e partnernan sosial. Ta p’esei mi ta bolbe boga – mi a yega di hasié kaba na otro okashon – pa invertí den diálogo sosial. E ta esensial pa un desaroyo stabil i duradero di e pais akí. No ta trata den e kaso ei di progreso material so, pero tambe di aspektonan di bienestar sosial i un ambiente di bida di bon kalidat. Antó no ta trata akí solamente di e trahadó, ma di esnan sosialmente vulnerabel: esnan sin trabou, esnan enfermo, hende grandi-, hóbennan, etc.

Nos sosiedat ta pará na bispu di kambionan sosial inmenso. E restrukturashonnan estatal proyektá por sierto lo tin konsekuensianan finansiero importante i pa e motibu ei tambe konsekuensianan sosial-ekonómiko. Awor akí i den e situashon nobo ei tambe e partnernan tin un tarea importante. E ora ei e representantenan di trahadónan i dunadónan di trabou mester traha den bon entendimentu na restrukturashon di e relashonnan sosial-ekonómiko.

Denter di un diálogo sosial bon desaroyá e situashon nobo ei ta ofresé oportunidat- i perspektivanan pa tur nivel di nos komunidat.

Kompañeronan, mi ta yega na un konklushon.

Dia di Obrero a desaroyá den e último 119 añanan di un dia di lucha pa un dia laboral di 8 ora, pa un dia pa hustisia sosial internashonal. Pa logra e hustisia sosial ei mester traha tur dia duru ainda, tambe na Antia Hulandes i na Kòrsou. No ta un kos ku ta bai di mes. Desafortunadamente den nos mundu,  inhustisia sosial no ta un eksepshon, tampoko den nos pais.

Riba e dia spesial akí, riba kua kristianismo i Dia di Obrero ta topa otro, mi ta riska di bisa for di e lugá konsagrá akí: “Reskatá esnan ku ta sin defensa”. Esei ta parse mi un pensamentu adekuá pa inisiá selebrashon di promé di mei.

Mi ta deseá boso un felis Dia di Obrero!