25 di Aprel 2008: entraga di Kondekorashon Real
Señora Minister Presidente, demas ekselensianan, distinguido invitadonan, tambe na nòmber di mi señora Dulcie un kordial bonbiní na un i tur i mui en partikular na nos kondekoradonan.
Awe nos ta bai honra ku distinshon real di su Altesa Lareina Beatrix algun persona ku un kaminda den Reino a destaká dor di dediká hopi tempu i energia na komunidat sin interes propio i den tur modestia.
E Reglamentu di òrdu pa kondekorashon real ta stipulá den artíkulo 2.2.b ku e persona ku hasi trabounan pa komunidat ku tin balor eksepshonal, ta bini na remarke pa un kondekorashon real. Hopi biaha ta trata di hendenan ku a funshoná komo boluntario indispensabel i ku desinteresadamente ta esforsá pa hasi trabou pa hóben- i otronan òf ku sin pago ta yuda resolvé problemanan sosial.
Den Reino Hulandes un gran kantidat di 3548 persona a haña kondekorashon, di kua 16 den e Orde van Oranje Leeuw i 3532 den Orde van Oranje Nassau.
Nos tin un kantidat di 36 persona ku lo risibí awe nan kondekorashon den Antias Hulandes, repartí di e siguiente manera riba nos islanan:
Kòrsou: 21;
San Martin: 7;
Boneiru: 5;
Saba: 2;
Statia: 1.
Nos tin awe tambe un persona ku via Hulanda a haña su kondekorashon, pero ku ta aki na Kòrsou i ku a petishon lo risibí su ornamentonan awe mainta den presensia di su famia i kolega(nan) di CITRO.
Na Kòrsou e personanan aki a risibí nan kondekorashon pa e siguiente motibunan:
señor Silos Ramon Salcedo, kende a desplegá hopi aktividat komo dirigente pa komunidat riba tereno di mantenshon di empleo, iglesia, barionan i deporte; señor Marcel Clemencio Rooi a hasi hopi riba tereno di kooperativa, trabou di bienestar, hóbennan desabilitá i ansianonan; señor Oswin Gregorio Martina riba tereno di mantenshon di órden públiko i seguridat i kanto di kor; señor Lorenzo Sebastiaan Martina riba tereno di restorashon di muebelnan antiano antik i pasando su konosementu pa otronan, konservando asina ei e patrimonio kultural antiano; señor Hein Antonius Maria van Maarschalkerwaart riba tereno di enseñansa, muzik i di asistensia sosial; señora Maria Theresa de Lannoy a desplegá hopi aktividat pa komunidat riba tereno di deporte; señora Zjerista Toribia Felomena Gaarie a hasi trabounan atmirabel riba tereno di kuido; señor Ivan Pedro de Windt a desplegá vários aktividat komo dirigente riba tereno di deporte, kultura, aviashon i kuido di adikto; señor Imro Herman van Wilgen ta hopi aktivo komo dirigente riba tereno di enseñansa, aktividatnan despues di skol, deporte, polítika i kuido di adiktonan; señor Bruce Donald Soemanta ta dirigente durante vários aña riba tereno di scouting, mantenshon di órden públiko i seguridat; señora Cornellie Elfride Schoonhoven-Muntslag, kende desde 1950 a desplegá aktividatnan komo dirigente pa personanan desabilitá na Kòrsou i partikularmente riba tereno di partisipashon i integrashon di siegunan den komunidat; de heer Ane Tjalf Ruijg, die zich verdienstelijk heeft gemaakt als stuurman en als schipper voor de Koninklijke Nederlandse Redding Maatschappij (de KNRM) verbonden aan het station Terschelling; señor Darcy Julien Lopes, kende ta dirigente desde 1968 riba tereno di scouting, iglesia i deporte; señor Elton Porfirio Lauf, kende ta dirigente desde 1965 riba tereno di mantenshon di bario Otrabanda, kultura i deporte; señor Roberto Luis José de Lannoy, kende ta dirigente desde 1983 riba tereno di salubridat, kuido di ansianonan i muzik; señor Jay Bryant Haviser, ku desde 1993 ta dirigente riba tereno di arkeologia i kultura; señora Jamilie Ramona Haile, kende desde 1970 ta hasiendo trabounan atmirabel riba tereno di kuido di personanan desabilitá; señor Eric Lion Garcia ta dirigente riba entre otro tereno bankario, deporte i salubridat; señor Daniel Sickman Corsen ta desde 1973 dirigente aktivo riba tereno di scouting; señor Gilberto Melanio Coffi, desde 1979 ta dirigente riba tereno di kuido sosial, penshonadonan, deporte i enseñansa; señor Rubert Marie Breusers ta dirigente riba tereno di kuido pa hóbennan, órden públiko i seguridat; señor Carel Nicolaas Winkel a destaká komo médiko i desde 1993 ta dirigente riba tereno di kuido, di karidat i di kombatimentu di AIDS.
Na nòmber di su Mahestat Reina Beatrix, Gobièrnu di Reino, Gobièrnu di Antia Hulandes i ku pèrmit di gezaghebber tambe na nòmber di Gobièrnu di Kòrsou i na nòmber di Dulcie mi ta felisitá boso tur ku boso kondekorashon.
Namens de Burgemeester van de Gemeente Terschelling ook een speciale felicitatie voor de heer Ane Tjalf Ruijg.
Mi ke ekspresá mi apresio pa boso esfuersonan, pa e trabou di boluntario na bienestar di nos hubentut i pa sirbi komo modelo.
Masha danki na nòmber di henter pueblo i di tur esnan ku por a benefisiá di boso servisio- i trabounan, pa tur loke boso a hasi i ta hasiendo pa nos pais i pa nos islanan.
Masha pabien tambe na famia-, amigu-, kolega- i konosínan di e kondekoradonan.