22 april 2006 : Diskurso na okashon di selebrashon di Dia di San Jorge, 22 di aprel 2006 pa Gobernador Frits Goedgedrag.

“I believe that children are our future,

  teach them well and let them lead the way.

  Show them all the beauty they possess inside.

  Give them a sense of pride, to make it easier.

  Let the children’s laughter remind us how we used to be”

Esaki ta e letranan di un kantika, protagonisá entre otro pa George Benson i Whitney Houston.

Lidernan, hóbennan skout, mayornan i distinguido presentenan, bon tardi i felis Dia di San Jorge, Sint Jorisdag.

Hóbennan,

si boso tuma riesgo den bida, bo por frakasá, pero bo por logra tambe.

Mi a tende un minister Hulandes bisa un biaha “Niet geschoten, is altijd mis”.

Si boso no riska, bo lo frakasá sigur !!

E riesgo di mas grandi di bida ta di keda sin  hasi nada. Den Scouting nan ta siña boso esaki. Nan ta siña boso ku bo no por sinta ketu, ku bo lo mester hasi algu, pues tuma riesgo pa progresá den bida.

Scouting ta siña boso kon pa tuma e riesgonan.

Esaki ta sosodé asina natural ku bo lo no ta ni ripará mes. Durante bo periodo den Scouting  lo bo no sa mes, pero despues sí !!

Ora bo ta un tiki mas grandi, bo lo ripará ku Scouting ta madurá bo na un manera responsabel.

Mi ta papia pa mi mes awor aki.

Bosonan ta miembro di Scouting Antiano, ku ta selebrando su di 15 lustro; un organisashon pues ku pa 75 aña ta kumpliendo ku e promesa ku Robert Baden-Powell a hasi den su buki “Scouting for boys” na 1908.

El a primintí di siña boso, hobennan sivismo, kurashi, inventividat i.o. Nos a papia di esakinan kaba dia 18 di novèmber di aña pasá den Aula di Banko Sentral.

Pa e lidernan,

un konosido yu di Kòrsou a bisa algun aña pasá:

“Si boso tin un vishon pa un aña, kultivá flornan, orkidia por ehèmpel.

  Si boso tin vishon pa 10 aña, planta matanan grandi.

  Pero si bo tin vishon, basá riba kontinuidat, krea hende”.

Bosonan ta kreando hende pa años kaba den e vishon di San Jorge i Baden Powell.

Un petishon dramátiko ta bai na boso pa por fabor kontinuá ku e bunita obra aki. Ku e trabou balioso aki boso no solamente ta haña satisfakshon personal, sino alabes ta kumpli ku nos mishon na mundu, esta di sirbi nos próhimo, den e kaso aki nos hóbennan, ku nos ta stima asina tantu.

Scouting no ta solamente benefisioso pa nos hóbennan, pero tambe pa e lidernan.